Onte realizouse a entrega ós clubes e asociacións deportivas do Concello de Mos do material concedido por parte da Deputación de Pontevedra para uso das devanditas agrupacións. A entrega levouse a cabo no Pavillón Óscar Pereiro e contou coa asistencia da alcaldesa de Mos, Nidia Arévalo, o concelleiro de Deportes e tenente alcalde de Mos, Alberto Méndez, representantes do Club Deportivo Louredo, Club Louro-Tameiga, Club de Patinaxe Artístico Rosaleira Mos, e Unión Deportiva Mos.

En total repartíronse 419 elementos entre balóns de fútbol, conos, cordas de salto para ximnasia, petos, picas, redes de fútbol, bandas elásticas, esteiras e balóns de fútbol sala.

O número de balóns repartidos ascendeu a 120, mentres que balóns de fútbol sala foron 20, conos 50, cordas de salto para ximnasia 24, esteiras 34, petos 105, redes de fútbol 6, bandas elásticas 16 e picas 44.

Os representantes dos clubes deportivos, xunto coa rexedora local, asinaron as actas de recepción do material. Material de gran importancia para o óptimo desenvovemento da actividade diaria dos equipos que integran estes clubes de fútbol e patinaxe e nos que se adestran centos de nenos e nenas mosenses.

Neste sentido os representantes municipais, Arévalo e Méndez, destacaron que “todo apoio é pouco para o deporte base mosense, xa que é necesario educar dende as categorías inferiores nos hábitos de vida saudables, a capacidade de superación, o compañeirismo, o espíritu de equipo, o respecto polo rival e a competición sá e limpa”. E para poder facer todo isto fan falla medios materiais: infraestuturas e material de adestramento e competición. “Non esquezamos que o mellor xeito de poñer en práctica todos estes valores, fundamentais na sociedade actual, e nos que é vital educar ós nosos/as nenos/as e mozos/as, é facendo deporte pero sempre nunhas condicións óptimas para os cativos”.