O Concello de Mos continúa coa súa intensa aposta polo fomento do emprego mediante a contratación de novos traballadores de distintas categorías. Agora contratará temporalmente, grazas a unha subvención do Servizo de Traballo e Economía Social da consellería de Economía, Emprego e Industria da Xunta de Galicia, a cinco persoas en situación ou risco de exclusión social perceptoras da RISGA, que realizarán labores de apoio ás áreas administrativas e atención ao público, e de mantemento e limpeza de edificios e espazos públicos.

Concretamente, o persoal contratado serán dous auxiliares administrativos –un que traballará na Biblioteca Municipal polas tardes e outro servirá de reforzo ó departamento de Participación Cidadá-, un ordenanza que traballará na Axencia de Colocación, e dous operarios de limpeza. Todos terán un contrato de sete meses de duración ó 75% da xornada laboral.

O posto de ordenanza terá as funcións de controlar o acceso ás dependencias da Axencia de Colocación, atendendo e orientando ás personas que acudan a ela, distrubuír material e documentación, preparar as instalacións para reunións ou actividades colectivas, abrir e pechar o edificio, e atender o teléfono.

Os dous auxiliares administrativos realizarán traballos de apoio ás áreas administrativas da Biblioteca Municipal e o departamento de Participación Cidadá mediante atención telefónica e ao público, e realización de trámites.

Os dous operarios de limpeza levarán a cabo tarefas de limpeza e mantemento de superficies e mobiliario existentes nos edificios dependentes do Concello.

A administración local mosense recibirá neste senso da Xunta unha subvención de máis de 50.000 euros coa que se financiarán íntegramente os soldos destes cinco novos traballadores.

A alcaldesa de Mos, Nidia Arévalo, e a concelleira de Persoal e Política Social, Sara Cebreiro, manifestáronse satisfeitas e optimistas ante o índice do desemprego en Mos, que esperan que “con accións coma esta de contratación de novos traballadores para o Concello e o repunte que parece que está a experimentar a economía a nivel nacional, as cifras do paro comecen a descender radicalmente”, dixeron.