Segundo o PP local "é incrible que a mediados de xullo o entorno da Freixa presente un triste e  lamentable estado de abandono, zonas de aparcamento e accesos aos areais sen desbrozar, e máis incrible é que a esta altura do calendario de verán o goberno local aínda non contrataran aos socorristas encargados de vixiar pola seguridade dos bañistas".

Para o Portavoz do Grupo Municipal do Partido Popular, Salvador González Solla, considera que "esta debe ser a normal forma de proceder do goberno local e do seu Alcalde, xa que un ano máis teñen que ser as forzas políticas da oposición as que lle advirtan e denuncien a súa forma de proceder, evidenciando a pouca ou nula capacidade de xestión do goberno tripartito á hora de resolver e atender ás necesidades dos cidadáns".

Nun comunicado emitido dende o  Partido Popular esixen ao Alcalde "para que tome as medidas precisas para que, de maneira urxente, este areal conte co servicio de socorrista e ao mesmo tempo se faga unha labor seria de limpeza e mantemento dunha das zonas máis importantes de recreo e lecer de moitos veciños e visitantes".