O Concello adxudicou no día de onte traballos por valor de 121.297,78 euros, que se desenvolverán durante catro meses e nos que se dedicarán 8 horas diarias a limpar e rozar as cunetas das parroquias.

O Concello de Mos iniciará esta semana un plan de limpeza de cunetas, beiravías e marxes nas estradas do municipio, para o que contará con maquinaria e persoal suficientes para poder acometer dun xeito rápido a limpeza de cunetas e roza de marxes.

 
Trátase de evitar o efecto prexudicial que a vexetación ocasiona nas estradas, non tan só na vida do firme, polo feito de impedir unha rápida evacuación das augas, senón tamén polas graves dificultades que orixina ao tránsito como consecuencia da redución da visibilidade que ocasiona.

Tras a recente adxudicación do servizo, a alcaldesa de Mos, Dª. Nidia Arévalo, e o concelleiro de Limpeza Viaria, D. Cándido Pérez, anunciaron que se iniciarán de xeito inminente os traballos, en cada unha das parroquias de Mos.

"Este plan urxente  de limpeza viaria fíxose especialmente necesario debido ao retraso da subvención solicitada á Deputación Provincial no pasado mes de marzo, e da cal aínda tivemos razón a semana pasada. Por tanto, e debido á climatoloxía favorable para o crecemento da maleza, dende o pasado mes de xuño, tivemos que recorrer a persoal propio do Concello destinado a Obras e Servizos para realizar este labor, un persoal municipal que fixo un esforzo encomiable para suplir a tardanza da chegada da subvención  destinada a ese fin” conclúe a rexedora municipal