O Festival Intercéltico ‘O Son do Pazo’ recibiu hoxe na segunda xornada da súa segunda edición, a visita do conselleiro de Cultura, Educación e Ordenación  Universitaria, Román Rodríguez, que estivo acompañado da alcaldesa de Mos, Nidia Arévalo.

Hoxe, sábado día 13 de agosto, a partir das 17:00 horas, realizouse unha concentración de coches Seat 600, dende as 20.00 horas tivo lugar o Festival BailaMos, e xa ás 22.00 horas chegaron os concertos a cargo dos Gaiteiros da Ruada C.C. de Torroso, Teixadura e Akelarre Agrocelta.

 ‘O Son do Pazo’ acolleu este ano o festival de música e danza tradicionais BailaMos. Na presente edición participaron un total de 7 grupos.

O Festival BailaMos naceu no ano 2012 da man da concellería de Cultura do Concello de Mos como unha xuntanza de grupos de música e baile tradicional do municipio mosense, co obxectivo de facer un intercambio cultural que resulte beneficioso e satisfactorio para todos/as os/as participantes.

O contorno do Pazo de Mos acolleu este ano, con motivo da celebración da II Edición do Festival Intercéltico ‘O Son do Pazo’, o Certame Municipal de Música e Danza Tradicionais BailaMos.

O Festival BailaMos contou este ano coas actuacións de:

• Grupo de baile Ruada de Torroso
• Grupo Folclórico Arume
• As Zaragateiras de As Pedriñas
• Agrupación Cultural A Cividade
• Grupo de Baile do Círculo Cultural Abrente
• Grupo de Baile Galego Santa Eulalia
• Grupo de Baile Galego Celado de Cela

Estes sete grupos participantes actuaron neste encontro altamente enriquecedor tanto para eles como para todo o público asistente, xa que con actividades coma esta contribúese á conservación da música e do baile tradicionais galegos, fomentando tanto o seu estudo e práctica, coma o interese neles por parte da poboación da nosa localidade.

En total actuaron preto de 200 bailaríns e músicos, entre os que se atopaban os máis pequenos, os cativos de cada unha das agrupacións folclóricas mosenses participantes, que soen ser, ano tras ano, a sensación do certame.

Por outra banda onte, venres 12 de agosto, a partir das 22:00 horas, realizouse a apertura do Festival ‘O Son do Pazo’ coa Banda de Gaitas Airiños do Castelo, seguida dos grupos Malvela e Tiruleque.

O Festival Intercéltico  ‘O Son do Pazo’ é un festival de música folk que se realiza en Mos, concretamente no entorno do Pazo de Mos. Esta é a segunda edición, para a cal contouse con grandes grupos do mundo folk; pretendendo que este Festival se convirta nun referente da música galega, tanto neste Concello como na zona sur de Galicia e norte de Portugal.

Este evento esta organizado polo  Círculo Cultural e Deportivo Santa Eulalia de Mos, (con sede no Pazo de Mos), contando coa colaboración da Xunta de Galicia, o Concello de Mos e a Fundación Pazo de Mos.

Respecto do mesmo a alcaldesa de Mos, Nidia Arévalo, agradeceulles encarecidamente hoxe a todos os que o fan posible, os seus traballo e colaboración “tanto á entidade organizadora Círculo Cultural e Deportivo Santa Eulalia, como a colaboración da consellería de Cultura, Educación e Ordenación Universitaria, e do seu conselleiro Román Rodríguez”, dixo.

Obxectivo do Festival
A idea principal é consolidar este evento como un referente da música galega, pasando a formar parte dunha das citas máis importantes do panorama folk. Tamén se persegue o obxectivo de converter este evento nun festival intercéltico onde o público poida gozar  da música de grupos da cultura Celta.

Os asistentes a este Festival contaron cun lugar para poder realizar acampada libre e así  poder disfrutar dos dous días de concertos. A acampada, totalmente gratuíta, puido facerse no Pavillón Patricia Martínez, xunto ao Colexio Mestre Martínez Alonso de Castro-Mos. Tamén estiveron abertas ao público sendas exposicións de coiro e instrumentos tradicionais durante os dous días do Festival.