A Xunta de Galicia, a través da Consellería de Infraestruturas e Vivenda, adxudica dúas vivendas nas cidades de Vigo e A Guarda a dúas familias que se atopan nunha complicada situación socioeconómica.

A Comisión Provincial de Vivenda de Pontevedra estudou os casos e propuxo a adxudicación directa destas vivenda, en réxime de alugueiro. Os citados inmobles foron cedidos ao Instituto Galego da Vivenda e Solo (IGVS) por parte da SAREB e ABANCA.

O Goberno galego avanza deste xeito no cumprimento do Plan rehaVita, que está a reforzar as medidas destinadas a garantir un fogar as familias máis desfavorecidas.

Estas solucións non só se dirixen a aquelas persoas que non poden afrontar o pago do alugueiro ou hipoteca da súa vivenda, senón que tamén se ofrece colaboración a outros problemas de índole social.

A Consellería de Infraestruturas e Vivenda lembra que está a dar resposta a todas as familias que solicitan axuda. Neste sentido, no último ano multiplicáronse os esforzos para achegar solucións ás persoas en situación de risco, mediante novos programas de axuda como o Bono de Alugueiro social ou os convenios con entidades financeiras.