Un percebeiro desapareceu onte na costa da Guarda. O home, duns 62 anos, caeu ao mar dende unha zona rochosa preto dun faro, entre A Guarda e Oia. Unha persoa particular contactou co 112 Galicia ás 21:00 horas da pasada noite. Indicou que fora coller percebes co seu amigo e que había unhas dúas horas que non sabía nada del.

O 112 Galicia puxo en marcha un operativo de rescate para localizar o home. Alertouse a Salvamento Marítimo e ao Servizo de Gardacostas de Galicia. A desaparición tamén foi posta en coñecemento do GES da Guarda, dos Bombeiros do Baixo Miño, de Protección Civil e da Garda Civil. Salvamento Marítimo mobilizou o Pesca 1. O helicóptero peiteou a zona na procura dalgún indicio ata ben entrada a madruga, con resultado negativo. A Garda Civil enviou unha embarcación, mentres que por terra participaron no operativo varios efectivos do GES, de Protección Civil e da Garda Civil.

As tarefas de busca retomáronse esta mañá, contra as 8:30 horas. A esta hora xa están a participar no dispositivo un helicóptero, a embarcación Salvamar Mirach e a Río Guadalupe. Por terra, varios efectivos do GES e de Protección Civil están a peitear a zona.