Todos os grupos da Corporación do Porriño, acordaron este martes, durante a reunión da Xunta Municipal de Voceiros, convocar unha concentración o venres día 30 de setembro, para esixir o soterramento das vías que pasan polo centro da vila.

O Concello dirixirase ao Goberno do Estado e aos responsábeis do Administrador de Infraestruturas Ferroviarias (ADIF )para concretar a aprobación dun proxecto que acabe co paso do tren polo medio do Porriño, unha reivindicación que data da metade do século pasado e que nestes 60 anos non foi atendida, maila aos accidentes e a perda de vidas nestas décadas.

Hai exactamente un ano, a alcaldesa, Eva García de la Torre, mantivo en Madrid unha xuntanza con Javier Gallego, daquela director xeral de Explotación e Construción de ADIF, na que Gallego comprometeuse a que o Administrador de Infraestructuras Ferroviarias financiaría a metade das obras de soterramento.  Aquela reunión fora solicitada por García de la Torre logo dos persistentes fallos de seguridade nas barreiras do paso a nivel, que non se baixaban cando pasaba o tren, co conseguinte perigo extremo para os cidadáns.

Pasado este tempo sen ter máis novas de ADIF, e logo de que a Corporación aprobase pedir á Xunta a cesión da titularidade de  Progreso y Buenos Aires- dúas calles clave porque nelas hai que acometer varias obras que permitan o soterramento das vías- o pasado 31 de agosto, apenas dúas semanas antes do accidente, a alcaldesa solicitou unha xuntanza coa actual directora xeral de Explotación e Construción de ADIF, Isabel Pardo, para retomar este proxecto, petición que, a día de hoxe non foi atendida.

Unha vez máis, a alcaldesa,no nome da Corporación, volverá a dirixirse aos máximos responsábeis das comunicacións e infraestruturas de España, o presidente do Goberno e o ministro de Fomento, que estiveron no Porriño o mesmo venres do accidente e puideron comprobar, en persoa, os danos, e aos directivos de ADIF, para que concreten os prazos para o inicio deste proxecto.

A Corporación cre que a traxedia ocorrida o pasado venres, día 16, na que perderon a vida catro persoas e outras 49 sufriron feridas de distinta gravidade, é unha dolorosa e terrible proba de que é necesario que o ferrocarril deixe de transitar polo centro do concello, de xeito que se garanta a seguridade, tanto das veciñas e veciños do Porriño, coma dos usuarios dos trens que pasan pola vila.