“En Ruta coa Depo” desenvolveu esta pasada fin de semana as segundas saídas para coñecer lugares emblemáticos da provincia, nas que participaron máis de 600 persoas de 7 concellos diferentes. En concreto, participaron a Asociación de Mulleres Rurais Santa Tecla (A Guarda), o Club de Xubilados e Pensionistas Nosa Señora do Carme (Moaña), o Centro Recreativo e Cultural do Torroso (Mos), a Asociación Cultural Reiriz 2016 A Queimada (Pontevedra), o Centro Social e Cultural de Cedeira e a Confraría de Pescadores de San Juan (Redondela), o Club de Pensionistas de Sanxenxo e a Asociación de Veciños San Roque (Vigo).

As persoas do Centro Social e Cultural de Cedeira, da Confraría de Pescadores de San Juan e da Asociación Cultural Reiriz 2016 A Queimada visitaron O Grove e A Ría de Arousa. Dende a Asociación de Mulleres Rurais Santa Tecla percorreron Barro, Portas, Caldas e Cuntis, mentres que dende o Club de Xubilados e Pensionistas Nosa Señora do Carme achegáronse ata Silleda e a súa zona. Por parte do Centro Recreativo e Cultural de Torroso visitaron Catoira, Vilagarcía de Arousa e Cuntis e membros do Club de Pensionistas de Sanxenxo achegáronse ata A Guarda e o conxunto histórico de Tui. Por último, a Asociación de Veciños San Roque coñeceu o conxunto histórico de Cambados e a senda fluvial do río Umia en Ribadumia.

“En Ruta coa Depo” é un programa da Deputación de Pontevedra que propón alternativas de lecer dinámico e saudable pretendendo mellorar a participación, a convivencia e a cohesión social dos distintos colectivos sociais da provincia de Pontevedra. Ofŕecense un total de 18 rutas por lugares emblemáticos da provincia con distintos tipos de propostas para todos os públicos: rutas dinámicas e activas para a xente máis moza, rutas interxeracionais para Anpas e familias, rutas adaptadas para persoas con mobilidade reducida, rutas marítimas e rutas por enclaves singulares.

Este programa, xestionado a través do Servizo de Cohesión Social e Xuventude, vai permitir que, ata finais de ano, máis de 18.000 persoas coñezan mellor a provincia. A Deputación de Pontevedra inviste 238.500 euros nesta iniciativa.