O Diario Oficial de Galicia publicaba a Resolución do Instituto Galego da Vivenda e Solo pola que se aproba o expediente de expropiación que afecta aos terreos necesarios para a construción da estación de tratamento de augas potables e a súa correspondente captación  para Plataforma loxística de Miño-As Neves (Plisan). O expediente afecta a un único predio, de 1.205 metros cadrados.

A Consellería de Infraestruturas e Vivenda avanza deste xeito nos trámites necesarios para a contratación nos vindeiros meses dos equipamentos de depuración e saneamento necesarios para o desenvolvemento da Plataforma loxística.  Estas infraestruturas, xunto coa urbanización interior da zona cualificada como “Loxístico-Empresarial”, que tamén se contratará proximamente, suporá un investimento de preto de 20 millóns de euros.

 

O investimento necesario para a ETAP e a EDAR, ademais da urbanización interior da área loxístico-empresarial é de aproximadamente 20 millóns de euros, que achegan a Xunta, a Zona Franca de Vigo e a Autoridade Portuaria

 

Ese financiamento será achegado polos tres organismos que están a promover a Plataforma loxística de Salvaterra-As Neves en réxime de condominio: a Xunta de Galicia, a Zona Franca de Vigo e a Autoridade Portuaria desa cidade.

Actualmente estanse executando as obras correspondentes aos servizos xerais da Plisan, iniciadas en outubro de 2015 e con data de remate prevista para o próximo mes de abril de 2017. No momento actual o grado de execución de ditas obras, cun orzamento de preto de 13 millóns de euros é de arredor do 40 por cento.