A concelleira de Emprego e Benestar, Soledad Girón, acompañada pola delegada territorial de Emprego da Xunta, deu a benvida este xoves aos 20 participantes no Obradoiro de Emprego que durante 6 meses, dende este 29 de setembro, ao 28 de marzo de 2017, adquirirán coñecementos de albanelaría e traballo forestal.

Os participantes, homes e mulleres, seleccionados pola Oficina do Servizo Galego de Emprego, farán un traballo remunerado e con alta na Seguridade Social durante os seis meses de duración do obradoiro recibindo, ao mesmo tempo, formación, teórica e práctica, de profesionais acreditados que contribuirán a mellorar a súa empregabilidade.

O obradoiro estará dividido en dúas actividades: nunha delas 10 alumnas e alumnos acometerán a reforma da antiga Escola Unitaria de Covelo, na parroquia de Atios, realizando operacións auxiliares de revestimento; a segunda delas consistirá na restauración ambiental da parcela en ruínas do Centro de Interpretación  da Natureza nas Gándaras de Budiño.

O orzamento total do obradoiro será de 179.134,2€, dos que o Concello do Porriño pon un total de 40.000 €, asumindo a Administración galega os 139.134,2€ restantes.