A día de hoxe, o grao de execución do Plan Concellos 2016 sitúase no 98,8% nas súas catro liñas de actuación (1 de investimentos; 2 de gastos correntes, amortización e pagamento de débedas; 3 de actividades deportivas, culturais, musicais e medioambientais e 4 de plan de emprego). As liñas 2, 3 e 4 xa están ao 100% dende fai semanas, mentres que a liña 1 é a única que aínda non se completou, pero está xa a piques de facelo cun 98,2% de execución. Isto supón que, na actualidade, máis de 39 millóns de euros da Deputación de Pontevedra xa están investidos nos concellos a través deste plan provincial de cooperación cos municipios.

Dos 60 concellos da provincia que integran o Plan Concellos (todos agás as cidades de Pontevedra e Vigo, que contan con plans especiais), a día de hoxe hai 58 que xa teñen concedido o 100% das catro liñas. A través de resolucións presidenciais e da Xunta de Goberno, a Deputación está traballando para completar a totalidade de investimentos que faltan nos concellos de Marín e de Gondomar, que se pecharán nas próximas semanas.

O Plan Concellos 2016, a día de hoxe, leva investidos algo máis de 39 millóns de euros, dos 40 millóns previstos, nos 60 municipios da provincia incluídos neste plan provincial. Só queda por completar a liña 1 de investimentos, que se atopa xa ao 98,2% con algo máis de 27 millóns de euros destinados para investimentos nos  municipios.

Dentro das políticas de apoio aos concellos dende a institución provincial, cómpre lembrar ademais que, aos 40 millóns de euros do Plan Concellos 2016, lles hai que sumar todas as axudas dos distintos servizos provinciais -servizos sociais, deportes, xuventude ou cultura, entre outros-. Deste xeito, sitúase por enriba dos 60 millóns de euros a cifra total de investimentos este ano nos concellos da provincia.