Despois de que un gran número de veciños e veciñas, colectivos veciñais e culturais e plataformas mostraran o seu desacordo con esta infraestrutura, o grupo municipal socialista levará este venres a pleno unha iniciativa para crear unha comisión informativa que lle dea voz as inquedanzas veciñais na procura dunha solución.

Dende diferentes colectivos, os veciños mostran a súa preocupación pola seguridade do mesmo, así como aspectos tales como que o uso que se lle está dando non é o fin polo que foi proxectada esta obra. Distintas motivacións que levaron a que os veciños se organizasen na recollida de firmas en contra do carril.

Dende o grupo municipal, explican a obriga que ten a administración de escoitar ós veciños e de velar pola súa seguridade. Con este sentir, solicitan a creación dunha comisión onde participen todas as forzas políticas, que estudie  con detalle todos os aspectos desta infraestrutura. Explican, que xa no pleno de decembro de 2014, o seu grupo, incidiu en parar a obra antes de rematala e estudiar os aspectos de mellora, ante as queixas veciñais. 

Nese mesmo pleno, o Alcalde asume a creación dunha comisión. En vista de que ese acordo, non se levou a cabo, instamos o equipo de goberno a que o poñan en marcha de inmediato, se constitúa a citada comisión e se inicie un diálogo social coa veciñanza, para escoitar as súas propostas e tomar decisións en relación coas melloras, a seguridade, modificacións e demais aspectos desta obra.

A voceira Verónica Tourón, incide en que a anterior voceira Marina Cabaleiro, xa mostrou no seu día a necesidade de buscarlle melloras a esta obra, que a pesar de ser aprobada por toda a corporación, xa mostrou a súa desconformidade naquel momento, posto que no intre de iniciar a obra comezouse a evidenciar a problemática.

As concelleiras, explican tamén que trataron este tema coa Deputación, administración que no seu día financiou a obra, pero o estar xa recepcionada polo concello, correspóndelle agora a este a toma de decisións sobre a mesma.

Trátase por tanto, de escoitar os veciños e veciñas e poñerlle fin a unha problemática que se ven arrastrando dende o inicio da obra, e sobre todo evitar males maiores en canto ós problemas de seguridade.