A Concellería de Vías e Obras, dirixida por Manuel Carrera, ven de rematar nun prazo de apenas dez días, a reforma do balastro da rúa Aloques, que demandaran os veciños ante a falla de seguridade que presentaba e que implicaba un perigo, especialmente para os cativos que xogan na zona.

Para rematar co mesmo, o Concello engadiu uns 70 centímetros de altura ao valado, que chegaba á altura dos xeonllos e que, dende agora, supera o 1,20 metros, dificultando a posibilidade de accidentes e cumprindo coa normativa, tanto de seguridade, coma de accesibilidade.

A obra abrangue os 30 metros de lonxitude do balastro e, na mesma empregouse pedra rosa Porriño, cumprindo coa intención do Goberno local, como xa anunciara Manuel Carrera, de usar sempre pedra do Porriño nas  obras municipais que se realicen na vila.