A música dos tudenses Best Boy encherá o Teatro Municipal de Tui este venres cun concerto “íntimo e intenso” co que a banda quere pechar o ciclo do seu primeiro traballo  “Cross the border”.

A finais de 2014 os músicos Ángel Sánchez e Lucas Fernández xuntaron os seus camiños para confluír en Best Boy para presentar en maio de 2015 o seu primeiro disco en común, “Cross the border”. Dende ese momento, a banda tudense iniciou un camiño de éxito que os levou a festivais como o Sinsal Son Estrella Galicia, o Atlantic Fest ou o Festival da Luz.

Agora, ano e medio despois de lanzar o seu disco, a banda, xa convertida en referente no panorama musical galego, pecha este ciclo cun concerto no que o folk e o soul serán os protagonistas.

Amais, os Best Boy non estarán sos no escenario.  O grupo tudense estará acompañado por Alex Ocampo, Manuel Ares, Raquel Cerviño e Elena García, como músicos confirmados, pero tamén preparan diferentes sorpresas coa actuación de artistas convidados cos que compartiron escenario nos diferentes festivais e que se descubrirán a partir das 21:30 da noite do venres.

Un concerto “na casa” que será gravado en vídeo e que promete completar o aforamento do Teatro Municipal de Tui. Arestora a venda de entradas vai a moi bo ritmo polo que é recomendable anticiparse na compra a través da plataforma online culturatui.info.

Concerto de Best Boy con “cross the border”
Data: Venres, 9 de novembro, ás 21:30h
Lugar: Teatro Municipal de Tui