O grupo provincial do Partido Popular pide ao goberno bipartito da Deputación de Pontevedra "que sexa previsor e que reserve nos orzamentos de 2017 unha partida para facer fronte ao mantemento e á reposición de herba sintética nos campos de fútbol da provincia máis deteriorados". O voceiro dos populares, Ángel Moldes, considera que é necesario que convoquen unha liña específica para mantemento e reposición, independente ao Plan Concellos, e recorda que os primeiros campos de herba sintética construídos na provincia xa teñen dez anos, que precisamente é o tempo de vida útil que se garante cando hai un uso intensivo do terreo de xogo.