A concellería de Medio Ambiente mosense que dirixe a edil Julia Loureiro, xunto coa empresa concesionaria do servizo de recollida de lixo e coa colaboración de Aemos, organizan unha reunión informativa aberta a todas as empresas de Mos, tanto pequenas (bares, cafeterías, farmacias, librerías, etc.), como medianas e grandes.

O encontro irá dirixido a presentar un novo servizo gratuíto de recollida de cartón porta a porta para empresas, industrias e establecementos comerciais. Celebrarase o vindeiro mércores, 23 de novembro, ás 20.00 horas no salón de actos da Axencia de Colocación.

Trátase dun servizo pensado para facilitarlles aos empresarios os labores de desfeito e reciclaxe de cartón ó tempo que se evita o desbordamento dos contedores destinados a ese material, que poidan dificultar o uso dos mesmos por parte de cidadáns particulares.