O Instituto Galego de Formación en Acuicultura (IGAFA) da Illa de Arousa acolle ata o 2 de decembro un curso de formación a través do que se instrúe a 20 persoas como formadores especializados para poder impartir cursos destinados ao sector da acuicultura en Galicia.

Cunha duración de 100 horas, este curso cofinanciado polo Fondo Europeo Marítimo e de Pesca (FEMP), contén unha primeira parte de didáctica, con sesións sobre programación e recursos, habilidades pedagóxicas e avaliación, impartidas por especialistas do instituto Ben pensante.

O resto das sesións dedícanse aos aspectos que o sector empresarial da acuicultura identificou como preferentes cara á capacitación dos seus profesionais, en resposta a unha enquisa previa realizada pola administración e son impartidas por diferentes especialistas. Algúns dos aspectos son a xestión da produción, a comercialización, a xestión sanitaria, a seguridade ambiental, a lexislación aplicable, a nutrición, as patoloxías, a automatización de procesos, a reprodución e a xenética.

A docencia de Programas de xestión da produción corresponde ao investigador do ECIMAT da Universidade de Vigo, Antonio Villanueva. Os investigadores Francesc Piferrer, do CSIC de Barcelona, e Ana María Viñas, da Universidade de Santiago, encárganse do apartado de reprodución e xenética. Por outra banda, Francesc Padrós, da Universidade Autónoma de Barcelona, é o responsable da parte de xestión sanitaria na piscicultura e Raquel Aranguren, do Laboratorio Nacional de Referencia de Enfermidades de Moluscos Bivalvos do Instituto de Investigacións Mariñas-CSIC, da de patoloxía de moluscos.

 

O curso contén unha primeira parte de didáctica e o resto das sesións impartidas por especialistas céntranse en aspectos como a xestión da produción, a comercialización, a xestión sanitaria, a seguridade ambiental, a lexislación aplicable, a nutrición e a reprodución

 

A formación de medio ambiente e seguridade ambiental corresponde ao secretario do Cluster da Acuicultura, Fernando Otero Lourido e a parte de medio ambiente e seguridade ambiental impártea María Silva, da empresa Noresga. Ademais técnicos Skretting encárganse da parte de nutrición de peixes e os relatores Fernando Malet, de Innovaqua, e Enrique Vega, de Integraqua Tecnology, ofrecen a formación de automatización de procesos e control de parámetros e de aplicación de novas tecnoloxías en acuicultura, respectivamente.

Por outra banda, os técnicos do Instituto Galego de Seguridade e Saúde Laboral (ISSGA) instrúen na parte de seguridade e saúde laboral e técnicos da administración en lexislación en acuicultura.

A maiores, o curso compleméntase con aspectos relacionados coa comercialización, así Juan Manuel Fernández, da Asociación Empresarial de Produtores de Cultivos Mariños de España (APROMAR), encárgase do apartado de comercialización e control de calidade na piscicultura e o director técnico de Conxemar, Julio César Doamo, xunto co do Centro Analítico Míguez Muíños, José Pelayo, son os encargados da parte de comercialización de moluscos bivalvos.