A concellería de Novas Tecnoloxías que dirixe o edil Óscar Soto, o CeMIT-Innova, VOLDIX e a Red Conecta organizan unha reunión sobre innovación dixital para asociacións mosenses que terá lugar o luns 28 de novembro ás 19.00 horas no salón de actos da Axencia de Colocación de Mos.

En dita xuntanza promoverase a participación activa dos representantes do tecido asociativo: que opinen e decidan cal é a ferramenta tecnolóxica máis adecuada ás súas necesidades. E para elo durante o encontro identificaranse as necesidades de cada asociación, sendo as propias agrupacións as que aporten a información e as propostas que consideren necesarias.

Coa axuda dun ‘aliado dixital’ (voluntario dixital) tratarase de localizar a ferramenta óptima en beneficio de todas as asociacións.

O que se pretende con esta iniciativa dende a administración local é a visibilización das entidades asociativas de Mos, que se fagan visibles, que se saiba que existen; e para iso son necesarias reunións coma esta de recopilación e intercambio de información. Así mesmo fomentarase a participación das entidades asociativas nas redes sociais, ao tratarse estas últimas das ferramentas dixitais con máis peso e presenza na actualidade.

Plataforma común
E o eixo central e fundamental desta reunión será a creación dun espazo común para tódalas asociacións interesadas, a través dunha ferramenta tecnolóxica común mediante a que cada unha poderá participar individualmente cun blog propio ou outra ferramenta na rede social Google +, por exemplo.

A idea é que toda a información que se incorpore a esta plataforma teña un tratamento individualizado elaborado por cada asociación en cuestión. E un aspecto moi importante e interesante, tratarase dunha ferramenta que permitirá que as entidades colaboren entre elas na medida que lles interese ou consideren necesario.

A idea
Este proxecto naceu tras detectarse a necesidade de divulgación informativa das actividades de cada asociación. Deste xeito surxiu a idea dun proxecto piloto para facilitar un espazo común a través dunha ferramenta dixital coa que poder compartir esa información.

Esta ferramenta poderá aloxarse na propia web do Concello de Mos, de xeito que se complemente tamén a información sobre o municipio con datos actualizados de tódalas asociacións veciñais, culturais, deportivas, etc.
En todo este proxecto é e será fundamental a colaboración dos voluntarios dixitais (VOLDIX).

En definitiva, trátase este dun proxecto piloto de innovación social dixital, cuxa finalidade é a introducción das novas tecnoloxías entre a poboación mosense a través da formación TIC e a visibilización e participación social das entidades asociativas nas que se concentra esa poboación. O Concello pretende que este espazo teña a consideración de ferramenta de marketing cidadán das entidades asociativas. É dicir, que sexa unha ferramenta que utilicen e nutran as entidades asociativas para darse a coñecer e dar a coñecer as actividades que se organicen desde as mesmas, e que a súa vez, permita obter oportunidades de colaboración entre elas ou con outras entidades de similar sector, ou calquera interesada.