O Concello de Mos congregou onte pola tarde ás directivas dos principais clubes deportivos do municipio así coma ás deportistas mosenses máis destacadas, Patricia Martínez e Susana Alonso Carballo, para facerlles entrega das axudas económicas que anualmente lles outorga a administración local.

En total repartíronse 24.100 euros en nove subvencións cuxos beneficiarios foron a xa mencionada bailarina Patricia Martínez, a ciclista de BTT Maratón, Susana Alonso, o Club de Fútbol Alerta de Sanguiñeda, a Unión Deportiva Mos, o Club Deportivo Louro-Tameiga, o Club de Natación Mos, as Escolas de Patinaxe de Mos, o Clube de Patinaxe Artística Rosaleira, e o Club de Xadrez Mos.

No acto de entrega estiveron presentes, ademais dos deportistas e entidades deportivas pertinentes, varios representantes municipais entre os que se atopaban a alcaldesa de Mos, Nidia Arévalo, e o concelleiro de Deportes e tenente alcalde, Alberto Méndez.

A rexedora local destacou durante a entrega a implicación do Concello de Mos como promotor da práctica deportiva. “O deporte non só fomenta os hábitos de vida saúdables, senón tamén principios educacionais tales coma o traballo en equipo, o esforzo, o afán de superación, a competitividade sá e o compañeirismo entre rivais; valores tan necesarios e importantes na sociedade actual”, dixo Arévalo. Quen apuntou tamén a este respecto que no orzamento para 2017, que será aprobado no vindeiro Pleno a celebrar o luns 28 de novembro, “en deportes auméntanse en case 62.000 euros a partida total. Pasando de 421.297,56 euros en 2016 a 482.683,07 euros en 2017. O máis salientable é a creación de catro novas subvencións deportivas para o Fútbol Sala Concello de Mos, Mos Feminino, Clube Tiro Con Arco e Clube Ciclista Avance –que se suman ás nove que acabamos de repartir-. Ademais da partida para mellora de equipamentos deportivos”.

E é que no presuposto do vindeiro ano increméntase a partida adicada a deportes para poder continuar a promover a actividade de clubes deportivos, tan importante para o enriquecemento da localidade. Faise un novo esforzo por manter a liña de axudas consignadas, así coma a introducción de algunhas novas. Deste xeito foméntanse, entre outros aspectos, as Escolas Deportivas.

Por último o edil de Deportes, Alberto Méndez, insistiu no apoio do Concello de Mos ó deporte base, “alicerce da actividade deportiva na localidade mosense e futuro da mesma”. “Se temos un deporte base forte, activo e de calidade, o futuro deportivo de Mos será prometedor”, declarou Méndez.