Baixo o lema ‘Móvete contra a violencia’ máis de 500 persoas participaron onte pola mañá na segunda edición da Macro Clase de Zumba contra a violencia de xenéro organizada polo Concello de Mos en conmemoración do Día Internacional contra esta lacra social.

Entre os máis de medio milleiro de participantes atopábanse a alcaldesa de Mos, Nidia Arévalo, a concelleira mosense de Política Social, Sara Cebreiro, a concelleira de Educación e Participación Cidadá, Kely Monzón, e a tamén edil mosense, Julia Loureiro.

A Macro Clase de Zumba ‘Móvete contra a violencia’, impartuse de xeito totalmente gratuíto e estivo patrocinada pola Obra Social La Caixa.

Sobre esta iniciativa Cebreiro, edil de Política Social, declarou que “dende esta concellería quixemos conmemorar este Día Internacional para a Eliminación da Violencia de Xénero coa realización de  actividades de sensibilización e concienciación, que contribúan  a que todas as persoas tomemos conciencia da situación de vulnerabilidade na que nos atopamos todas as mulleres; e tamén con iniciativas de mobilización como esta macro clase, que simbolizan a necesidade de que a sociedade tome partido e que non podemos quedarnos quietos, nin como vítimas nin como coñecedores do maltrato”. “A clave está en actuar, en moverse contra a violencia”, asegurou Cebreiro, e así o quixeron facer saber os máis de 500 veciños e veciñas de Mos que abarrotaron o Pavillón Óscar Pereiro.