30 empresas mosenses comezan a recibir o servizo gratuíto de recollida de cartón a domicilio para a súa posterior reciclaxe. Entre elas, as maioritarias pertencen aos sectores da hostelería e os talleres automobilísticos; aínda que tamén hai empresas de robótica, do sector agrícola, educativo, de electromecánica, química, de fabricación e venta de toldos, transportes, mobiliario-carpintería, etc. As ubicacións das empresas tamén son variadas e as hai dende as que están instaladas nos diferentes polígonos da localidade (Veigadaña, Rebullón, etc.) ata as que se sitúan en lugares illados do termo municipal.

Aínda que o servizo bota a andar con estas 30 empresas inscritas que se beneficiarán do mesmo, trátase dun proxecto aberto á futura e progresiva adhesión de novas empresas interesadas a maiores das xa existentes.

Tal e como xa se informou fai días, o pasado 23 de novembro, ás 20.00 horas a Axencia de Colocación acolleu unha charla informativa sobre este novo servizo ofertado pola concellería de Medio Ambiente mosense que dirixe a edil Julia Loureiro. A charla foi organizada por dito departamento municipal xunto coa empresa concesionaria do servizo de recollida de lixo e coa colaboración de AEMOS, Asociación de Empresarios de Mos.

 A concelleira destaca a “enorme operatividade deste servizo tanto para os beneficiarios, que non teñen que desprazarse ata os contedores, como para a empresa concesionaria do servizo de recollida de lixo, que axiliza os labores de recollida e reciclaxe deste tipo desfeitos; e para o Concello, que ofrece así un mellor servizo ós cidadáns e evita o colapso de contedores de papel e cartón que poida ocasionar molestias e/ou queixas de particulares”.

Este novo servizo pioneiro no municipio está aberto a todas as empresas de Mos, tanto pequenas (bares, cafeterías, farmacias, librerías, etc.), como medianas e grandes. Trátase dun servizo gratuíto de recollida porta a porta para industrias e establecementos comerciais pensado para facilitarlles aos empresarios os labores de desfeito e reciclaxe de cartón ó tempo que se evita o desbordamento dos contedores destinados a ese material, que poidan dificultar o uso dos mesmos por parte de cidadáns particulares.

As empresas aínda non adheridas ao servizo de recollida a domicilio de cartón que estean interesadas en facelo só teñen que poñerse en contacto telefónicamente con Urbaser, empresa concesionaria da recollida de lixo, no número gratuíto 900 720 190.