O primeiro punto da orde do día do pleno extraordinario do pasado mércores 30 de novembro foi a proposta do Goberno local dunha nova modificación orzamentaria de crédito por importe de 650.000 euros destinado ao pago do investimento da ETAP, débeda do ano 2010 que o anterior goberno deixara sen pagar e por lado o recoñecemento de débedas con acredores anteriores a 2011, facturas que tampouco estaban contabilizadas aínda que sí foran pagadas por Facenda en 2012 e descontadas co embargo dos ingresos mensuais que Ponteareas percibe do Estado.

No segundo punto, o Pleno rexeito as alegacións presentadas ao acordo de aprobación inicial de modificación das retribucións da praza de Técnico de Intervención. Deste xeito quedou aprobada a proposta do Goberno local para que esta praza conte cunhas condicións económicas similares a outros Concellos da categoría de Ponteareas.

O goberno local xustificou no Pleno a urxencia de tomar esta decisión por estar vacante dende hai máis de tres anos a praza de Interventor, e resultar imprescindíble para a xestión económica do Concello e as axudas dos cinco millóns de euros de fondos europeos logrados recentemente. O goberno aclara que nos 42.000 euros de custe anual desta praza está incluída a seguridade social polo que o salario bruto desta praza é inferior nun 30%.

 “Toda a Corporación manifestou que é fundamental cubrir esta praza pero a pesares de ser creada en 2010 dende aquela está vacante”  manifestou o alcalde Xosé Represas que xustifica o incremento de custe económico na responsabilidade e adicación que terá que asumir pola ausencia de Interventor titular.

O último asunto que tratou o Pleno da Corporación foi a dimisión do edil do PSdeG-PSOE, Mario Lago, ata agora concelleiro de Comercio, Hostalería e Consumo, estas áreas de goberno foron asumidas temporalmente pola Primeira Tenente de alcalde, María Jesús Garrote.