A Biblioteca Municipal do Porriño convoca un orixinal sorteo para este Nadal. O premio: unha cesta chea de libros. Ata o vindeiro 5 de xaneiro de 2017, todos os usuarios e usuarias que leven un libro ou película da Biblioteca para casa, entrarán automaticamente, no sorteo dunha gran cesta de Nadal que xa pode verse no mostrador de tránsito da biblioteca.

A cesta está composta por ducias de libros de distintas materias e para todas as idades, unha nutrida colección de obras para ler ao longo do ano que ven, que de seguro farán as delicias da persoa ou da familia afortunada.

Con esta actividade, a Biblioteca Municipal pretende ofrecer aos seus usuarios e usuarias un “agasallo literario”, logo de todo un ano de servizo e complicidade coa cidadanía. Fai uso así deste tipo de populares sorteos clásicos nestas datas, máis propios doutros ámbitos, como un factor dinamizador máis dos seus servizos bibliotecarios nas datas de Nadal.

A persoa agraciada neste singular concurso coñecerase o próximo 9 de xaneiro.