Dende as concellerías mosenses de Educación e Participación Cidadá e Promoción Económica, Emprego e Novas Tecnoloxías que dirixen os edís Kely Monzón e Óscar Soto, respectivamente; infórmase da organización de dous cursos que se ofrecen a mozos de entre 16 e 29 anos, inscritos no Servizo Público de Emprego Estatal.

Estes cursos lle foron outorgados ao Concello de Mos a través da convocatoria de plans de formación de ámbito estatal regulada pola Resolución 21 de agosto de 2015 do Servizo Público de Emprego Estatal (SPEE). A convocatoria está dirixida a xoves cun nivel formativo mínimo de graduado en ESO. A formación é semipresencial, xa que teñen unha formación presencial, en centro de formación, mínima de entre 32 e 43 horas, e o resto de horas será online e de prácticas en empresa.

As accións formativas ofrecidas son atención sociosanitaria a persoas no domicilio (600 horas) e atención sociosanitaria a persoas dependentes en institucións sociais (450 horas). A primeira das accións formativas comezará o día 12 de xaneiro mentres que a segunda farao o 16 dese mesmo mes.

O prazo límite para que os interesados en realizar estes cursos poidan inscribirse será o 3 de xaneiro, xa que os posibles alumnos teñen que realizar unha proba de competencia dixital antes de admitilos ao curso.

Para formalizar a inscrición as persoas interesadas poden comunicalo, deixando os seus datos (nome, DNI, data de nacemento, teléfono, correo electrónico) a través do correo electrónico: info@axenciadecolocacionmos.es ou omix@concellomos.es

O obxectivo destes cursos é universalizar o acceso das persoas traballadoras, ocupadas e desempregadas, e das empresas á formación. Os fins da formación para o emprego son favorecer a formación ao longo da vida, proporcionar os coñecementos e prácticas adecuados ás necesidades de empresas e persoas, contribuír á mellora da produtividade e competitividade das empresas, mellorar a empleabilidad das persoas, promover que as competencias profesionais adquiridas polos traballadores sexan obxecto de acreditación.