Nos últimos días o Concello das Neves recibiu para o departamento de Servizos Sociais máis de 600 quilos de alimentos e preto de 250 xoguetes que serán xestionados para entregar as familias con máis dificultades seguindo os criterios establecidos polas normativas que regulan as axudas sociais.

A 4ª Carreira Solidaria do Pavo que se celebrou pola contorna urbana das Neves tiña como único requisito para a inscrición a entrega de alomenos un quilo de alimentos por participante. Logo da recollida a Asociación Cultural Deportiva Sanomedio, organizadora da proba, entregou a cita cantidade de axuda.

Tamén por primeira vez nas Neves o Centro de Formación Escola Europea Parasanitaria pertencente ao Grupo GET con sede en Taboexa levou a cabo a xornada solidaria “Xoguete=Masaxe”. Celebrouse no pavillón municipal de xeito que calquera que asistiu cun xoguete recibiu unha masaxe gratuíta.

O Alcalde das Neves, Xose Manuel Rodríguez, agradecía o interese e a colaboración das asociacións e empresas para a consecución desta xornadas lúdicas e sociais que tanto aportan ao noso Concello.