Dúas persoas tiveron que ser liberadas nas últimas horas en Galicia despois de verse implicadas en accidentes de tráfico. En Ponteareas, os Bombeiros tiveron que excarcerar unha persoa despois de que o seu vehículo caese por un terraplén e envorcase. Aínda que a vítima resultou ilesa, foi necesaria a intervención dos equipos de emerxencia para liberala. 

O sinistro tivo lugar na estrada que vai de Ponteareas a Moreira, á altura de Angoares. A propia vítima deu conta da situación ao 112 Galicia ás 7:30 horas desta mañá. Segundo indicou, sufriu unha saída de vía nunha curva. O persoal do Centro de Atención ás Emerxencias informou aos Bombeiros de Ponteareas, que se desprazaron ao punto cun equipo de excarceración. Tamén se alertou a Urxencias Médicas, a Protección Civil e á Garda Civil de Tráfico. 

Atropelo 
Ademais, en Vigo, outra persoa tivo que ser excarcerada despois de ser atropelada. Aconteceu na Rúa Rosalía de Castro. 

O 112 Galicia tivo constancia da situación ás 22:10 horas da pasada noite, a través da alerta de Urxencias Médicas. Segundo se indicou, a vítima quedara atrapada debaixo do vehículo implicado. Resultou ferida de carácter leve.

Dende a central de emerxencias do 112 alertouse aos Bombeiros de Vigo, que interviron cun equipo de excarceración. Tamén se informou a Protección Civil e á Policía Local.