A alcaldesa de Mos tiña concertada onte unha reunión en Pontevedra coa presidenta da Deputación, Carmela Silva, á que finalmente acudiu o deputado David Regades no seu lugar.

Durante o encontro, Arévalo trasladoulle a Regades o mal estado das estradas provinciais ao seu paso por Mos facendo especial fincapé en dous viais: a estrada Puxeiros-Mos e a estrada Puxeiros-Peinador.

A principal preocupación da rexedora local é a estrada Puxeiros-Mos, gravemente afectada ao seu paso polas parroquias mosenses de Dornelas, Tameiga, Torroso e Mos, e que conta cun proxecto de mellora elaborado polo Concello e que leva presentado na Deputación de Pontevedra dende o ano 2009. Informa Nidia Arévalo de que o propio David Regades recoñeceulle  a prioridade da realización de obras neste vial.

Estas melloras na estrada Puxeiros-Mos non se fixeron co anterior goberno da Deputación de Pontevedra porque se acometeron primeiramente outros proxectos tamén de vital importancia para o municipio, segundo explica Nidia Arévalo.

O proxecto de mellora da estrada Puxeiros-Mos é un documento moi completo que consta de catro fases e un orzamento de máis de 600.000 euros, do cal unha parte sería asumida pola administración local mosense.

Respecto deste vial a alcaldesa informou tamén a Regades da moción presentada polo BNG no Pleno municipal do pasado mes de decembro e aprobada por unanimidade da Corporación instando á Deputación a que mellore a estrada Puxeiros-Mos.

A outra estrada prioritaria, a de Puxeiros-Peinador, constitúe un dos principais viais de servizos para a área de influencia de Vigo e é unha infraestrutura viaria que dende o Concello de Mos se pide que a Deputación de Pontevedra acondicione asumindo o cen por cen dos custes.

Por último Arévalo referiuse tamén á terceira estrada provincial mosense, a Peinador-Os Valos, na que urxen traballos de mantemento, limpeza viaria, e reparación de baldosas levantadas nas beirarrúas.

En resumo, a alcaldesa de Mos trasladoulle ao deputado Regades o mal estado das estradas provinciais do Concello en xeral, mal estado que quedaba patente nun informe valorado por técnicos municipais presentado ante a administración provincial en marzo de 2016 e sobre o que, 10 meses despois, aínda non houbo resposta.

Concluiu Nidia Arévalo insistindo en que “son moitas as queixas veciñais que nos chegan sobre o estado das estradas provinciais e que á súa vez dende o Concello remitimos semanalmente por escrito á Deputación de Pontevedra. Por iso Mos reclama que dunha vez por todas a Deputación actúe; xa que o que pedimos non é un sentir da alcaldesa, senón de toda a Corporación Municipal e dos máis de 15.000 veciños e veciñas mosenses”.