Os produtores de planta ornamental, flor cortada, fruticultura e empresas auxiliares do campo, aproveitarán, coma cada ano, para presentar as últimas novidades.

Hai xa 14 anos, viveiristas de Tomiño comezaron, xunto ao Concello, a organizar unha feira de cultivos, onde fora posible reunirse e presentar o resultado do seu traballo, as novidades do sector, as innovacións...O lugar escollido foi o pavillón polideportivo de Goián

Despois de moito esforzo loxístico, material e persoal, a Mostra de Cultivos do Baixo Miño, converteuse nun evento de referencia en Galicia e Norte de Portugal. A décimo terceira edición pechou as súas portas coa visita de máis de 3000 persoas e un incremento do volume de negocio e contactos comerciais superior ao 40%, con respecto ao ano anterior.

Este ano o comité organizador decidiu adiantar a celebración da 14ª edición ao sábado 4 e domingo 5 de marzo (habitualmente celebrábase en abril) co fin de facilitar a asistencia de público profesional nunhas datas que non son de plena campaña para o sector verde.

Os produtores de planta ornamental, flor cortada, fruticultura e empresas auxiliares do campo, aproveitarán, coma cada ano, para presentar as últimas novidades na produción e distribución dos seus produtos e maquinaria especializada.

A participación de varios viveiros portugueses e doutros puntos de Galicia, é outra das novidades das últimas edicións.

Coincidindo co Ano Internacional do Turismo Sostible para o Desenvolvemento, o eixo central da Mostra 2017 será a sostenibilidade, entendida coma a convivencia harmónica de economía, sociedade e medio ambiente.
A comarca do Baixo Miño é un paraíso natural onde o sector dos cultivos ten un peso económico importante. O obxectivo dos viveiros é seguir criterios sostibles nas súas producións con boas prácticas agrícolas e unha conexión co seu entorno máis próximo, participando en proxectos educativos para a infancia e a mocidade.