A alcaldesa de Mos, Nidia Arévalo, anuncia a intención de persoarse dende o Concello de Mos no procedemento xudicial fronte ao imputado pola morte de Marina Rodríguez Barciela, o seu marido, Florencio Alonso Calvar. Ao tratarse dunha administración local, os servizos xurídicos municipais están a estudiar a fórmula idónea para facelo.

Esta noticia chega tras a celebración dun minuto de silencio en memoria de Marina, que tivo lugar hoxe ás 12.00 horas na Praza do Concello.

O acto fíxose na memoria da veciña de A Rans, parroquia de Tameiga, falecida o 29 de decembro de 2015 con 69 anos de idade. Quíxose pedir xustiza para Marina, ademais de condear, unha vez máis, a violencia de xénero e os actos violentos en xeral.

Estiveron presentes Nidia Arévalo, alcaldesa de Mos, -que fixo lectura dun manifesto-, Sara Cebreiro, concelleira de Política Social, demais membros da Corporación Municipal e veciños/as e traballadores/as do Concello de Mos.

No seu manifesto a rexedora local mosense pediu “que o principal sospeitoso do seu asasinato, o seu marido, regrese ó cárcere canto antes e permaneza encarcerado ata que se celebre o xuízo, como debe ser o proceder habitual”. E tamén declarou que “hoxe Mos lembra á súa veciña Marina Rodríguez Barciela. Recordámola disgustados e preocupados por unha violencia que non cesa e porque o acusado da súa morte atópase na rúa”. Arévalo lembrou tamén á redondelana María José Mateo García, falecida o pasado luns, e expresou a solidariedade de tódolos presentes cos seus familiares e amigos”.