A Presidenta da Deputación de Pontevedra, Carmela Silva, impulsou  na xuntanza da subcomisión das institucións provinciais e cabildos da Federación Estatal de Municipios e Provincia (FEMP) a necesidade de que o Goberno do Estado  e as gobernos autónomos conten cos  concellos na redacción das leis sobre o funcionamento das administracións locais.

Carmela Silva incidiu nesta necesidade ao coñecer as dificultades coas que se atopan moitas deputacións e cabildos no noso pais  para a implantación da administración electrónica. “O Goberno español e as comunidades autónomas non poden decidir o que teñen que facer os concellos mediante leis sen dotalas economicamente e sen capacidade técnica para executalas”, subliñou Silva.

Por elo, dende a FEMP, destaca a Presidenta da Deputación, van dirixirse ao goberno de Mariano Rajoy  e, de igual xeito, as comunidades autónomas para que consulten aos concellos cando elaboren a lexislación que afecte a administración local para comprobar a viabilidade da posta en marcha de novas leis.

A Presidenta destacou que  a Deputación de Pontevedra é a primeira  en por en marcha a administración electrónica colaborando cos concellos para que podan implantala “pero moitas deputacións indicaron hoxe na xuntanza que non poden implantalas por problemas, como que non chega a banda ancha a todas as localidades ou que non teñen suficientes recursos económicos, ademais dos problemas que poñen os operadores de telecomunicacións”. Por elo a FEMP vai crear unha comisión de traballo cos técnicos de distintas deputacións para abordar as solucións á implantación da administración electrónica, “na que, por suposto, vai colaborar o noso departamento de novas tecnoloxías que tan bo traballo está a facer en moitos concellos da provincia para dotalos dos medios e das ferramentas para este fin”, subliñou Silva.

Outro dos aspecto principais abordados na xuntanza de hoxe da subcomisión das deputacións da FEMP  foi o despoboamento das zonas rurais de moitas provincias. A este respecto, Silva destacou que a FEMP está a elaborar un documento base que no mes de marzo vaise remitir a todas as deputación para que fagan as súas aportacións. “En Pontevedra imos enviar este documento a todos os concellos da provincia para que nos aporten aquelas cousas que consideren necesarias”, sinalou Carmela Silva.

En xuño a FEMP abordará nun encontro todas as aportacións dos concellos e das deputación para elaborar unha serie de medidas para evitar este despoboamento que serán remitidas ao goberno do estado.