A técnico de Emprego da Axencia de Colocación de Mos, unha voluntaria dixital mosense, e representantes das asociacións involucradas na RAM, Rede de Asociacións de Mos, asistirán mañá en Santiago de Compostela a unha xornada convocada pola Axencia para a Modernización Tecnolóxica, onde se exporán os 9 proxectos galegos seleccionados por esta e que reciben apoio autonómico.

A devandita xornada trátase do 3º Encontro do Programa CeMIT-Innova, promovido pola Amtega (Axencia para a Modernización Tecnolóxica de Galicia), no marco do Plan de Inclusión Dixital 2020 da Xunta de Galicia e aliñado coa Axenda Dixital de Galicia 2020. O encontro celebrarase no auditorio da Biblioteca da Cidade da Cultura entre as 09:30 e 13:00 horas de mañá.

Durante o mesmo impulsaranse os proxectos seleccionados para a superación de desafíos sociais, que converten as aulas CeMIT en espazos onde a tecnoloxía está ao servizo da Innovación Social Dixital. Os proxectos pilotos seleccionados na convocatoria 2016 do Programa foron un total de 9, entre os que se atopa a RAM, Rede de Asociacións de Mos, e outros proxectos de concellos coma os de Cuntis, Ares, Celanova e A Bola, etc.

A RAM consiste na agrupación das asociacións do municipio nun mesmo proxecto común de dixitalización para o tecido asociativo mosense. A día de hoxe o proxecto é unha realidade que conta cunha plataforma tecnolóxica dixital activa: o Facebook da Rede de Asociacións de Mos (RAM).

O proxecto piloto de innovación social Dixital InnovaticMos, inclúe a Fase de Formación e a Fase de Innovación Social Dixital, a través da que se creou o Facebook da Rede de Asociacións de Mos, RAM.

A Fase de Formación foi executada no 2016. A fase de Innovación Social Dixital iniciouse no mes de novembro e actualmente estanse incorporando progresivamente á plataforma as asociacións do municipio.

O obxectivo desta plataforma é que as asociacións mosenses teñan unha ferramenta común que poidan utilizar para dar difusión ás súas noticias, eventos e actividades, para que toda a poboación teña acceso a esta información, pero que tamén calquera persoa en calquera parte do mundo, poida ter acceso a ela.

O Facebook da Rede de Asociacións de Mos  está dispoñible para calquiera persoa que queira visibilizalo, e neste momento ten un alcance de 5.821 persoas (é dicir, persoas que lle deron a “me gusta”, fixeron algún comentario, ou solicitaron amizade). Polo que, queda demostrado o alcance que pode acadar esta ferramenta, que está ao servizo to tecido asociativo e da cidadanía mosenses, podendo compartir e consultar todalas aquelas noticias e actividades a desenvolver. Dende o departamento municipal de Novas Tecnoloxías que dirixe o edil Óscar Soto tamén se mantén activa diariamente esta ferramenta.

O que se pretende con esta iniciativa dende a administración local é a visibilización das entidades asociativas de Mos, que se fagan visibles, que se saiba que existen; e para iso son necesarias reunións coma esta de recopilación e intercambio de información. Así mesmo fomentarase a participación das entidades asociativas nas redes sociais, ao tratarse estas últimas das ferramentas dixitais con máis peso e presenza na actualidade.

A idea é que toda a información que se incorpore a esta plataforma teña un tratamento individualizado elaborado por cada asociación en cuestión. E un aspecto moi importante e interesante, trátase dunha ferramenta que permite que as entidades colaboren entre elas na medida que lles interese ou consideren necesario.

A idea
Este proxecto naceu tras detectarse a necesidade de divulgación informativa das actividades de cada asociación. Deste xeito surxiu a idea dun proxecto piloto para facilitar un espazo común a través dunha ferramenta dixital coa que poder compartir esa información.

En definitiva, trátase este dun proxecto piloto de innovación social dixital, cuxa finalidade é a introducción das novas tecnoloxías entre a poboación mosense a través da formación TIC e a visibilización e participación social das entidades asociativas nas que se concentra esa poboación. O Concello pretende que este espazo teña a consideración de ferramenta de marketing cidadán das entidades asociativas. É dicir, que sexa unha ferramenta que utilicen e nutran as entidades asociativas para darse a coñecer e dar a coñecer as actividades que se organicen desde as mesmas, e que a súa vez, permita obter oportunidades de colaboración entre elas ou con outras entidades de similar sector, ou calquera interesada.