Finalizado o mandato de Reina Duarte como presidenta da OEPLI asumiu esta representación o escritor e editor Xosé Antonio Perozo, actual presidente de GÁLIX.

A OEPLI é a máxima entidade representante en España do ámbito cultural da Literatura Infantil e Xuvenil que aglutina todos os niveis (escritores, ilustradores, editores, bibliotecarios, libreiros, educadores, mediadores...). Está integrada por catro seccións: Consejo General del Libro, GÁLIX, ClijCAT e Galtzagorri, representantes das catro linguas oficiais: castelán, catalán, galego e vasco. As súas presidencias ocupan as seguintes responsabilidades:

• Área Financeira: Iñaki Markotegi, presidente de Galtzagorri.
• Área de Contidos: Sara Moreno, presidenta do Consejo General del Libro.
• Área de Comunicación: Anna Maria Macià, presidenta do ClijCAT.

Manteñen o cargo de tesoureiro, Carlos Ortega, secretario xeral da Cámara del Libro de Madrid e do Gremio de Editores de Madrid. O de secretaria executiva, Margarida Mateu, secretaria do ClijCAT. Dona Ana Cendán continúa como secretaria técnica.

A nova presidencia continuará cos proxectos xa consolidados da OEPLI: Premio Lazarillo, Día Internacional, Premio Andersen, etc. e traballará na creación de novas iniciativas co obxectivo de seguir potenciando este sector da literatura tan importante tanto desde o punto de vista cultural como de industria e de creación de postos de traballo, así como de proxección internacional dos nosos valores e creadores.

A Organización Española para el Libro Infantil y Juvenil (OEPLI) é sección española do IBBY (International Board on Books for Young People). Foi constituída o 27 de xullo de 1982 ao deixar de existir a Comisión de Literatura Infantil do INLE (Instituto Nacional del Libro Español). A OEPLI, entidade sen ánimo de lucro, é a encargada da realización e coordinación de todo tipo de actividades de promoción relacionadas co libro infantil e xuvenil e a lectura, así como das funcións de representación en España do IBBY. Está estruturada en catro seccións territoriais e desenvolve as súas actividades no ámbito de todo o Estado español. Porén, en función de acordos con outras institucións con fins análogos tamén desenvolve actividade fóra de España.