A semana pasada comezaron os traballos de construción dun muro de contención en Veigadaña. Dito muro inclúese no plan de obras municipal que está a desenvolver o Concello de Mos ao longo do tramo do Camiño de Santiago que transcorre pola localidade mosense.

A obra de acometida do muro en Veigadaña está a ser financiada con fondos propios e conta con supervisión técnica municipal. Tal e como explican a alcaldesa de Mos, Nidia Arévalo, e o concelleiro de Vías e Obras mosense, Luis Alonso, trátase dunha construción de 60 metros de longo e cunha altura ascendente que vai dende 1 metro de altura na parte máis baixa a 6 metros de altura na parte máis alta.

O inicio dos traballos retrasouse un pouco no tempo debido ao desprendemento de terras causado polas inclemencias meteorolóxicas.

O obxectivo deste muro é a contención do talud que se atopa baixo a estrada que chega ata o local da Asociación de Veciños Santa Ana de Veigadaña, que funciona tamén como Albergue de Peregrinos. Así mesmo tamén se persegue coa acometida do muro a optimización da serguridade viaria dos peóns, tanto dos veciños/as coma dos peregrinos/as, sobre todo tendo en conta que na parte baixa do talud hai instalado un parque infantil.

Durante a súa visita ás obras, á que acudiron acompañados polo tenente alcalde Alberto Méndez, Arévalo e Alonso declararon sentirse “moi satisfeitos coa realización desra obra que era una importante demanda dos veciños da zona e que por fin é xa unha realidade”.

Ademais do muro construiranse tamén unhas escaleiras na marxe esquerda da Asociación de Veciños, que se dotarán dunha barandilla. Barandilla que tamén se instalará ao longo do muro.

O edil de Vías e Obras informou ademais de que se está a estudar a posibilidade de acometer, a maiores e unha vez rematadas estas obras, unha beirarrúa que comunique a parte alta do local da asociación e o Torreiro da Festa. E Luis Alonso anunciou, por último, que ao longo desta semana o muro de contención quedará rematado.
Outras obras

Esta iniciativa únese a outras no que representa un proxecto integral de mellora do Camiño de Santiago. Este plan inclúe ademais outras catro obras de gran importancia como son a da pasarela en Amieirolongo, a optimización da seguridade viaria para os peóns na Estrada Nacional 550, a construcción dun muro de contención dun talude en A Rúa, e a restauración do cruceiro do Santísimo Cristo da Victoria nos Cabaleiros.

O proxecto de mellora integral implica tamén o replantexamento dun tramo perigoso para os viandantes. O tramo alternativo dunha parte do traxecto do Camiño que transcorre por Mos trata de evitar os dous puntos negros máis perigosos, que se atopan entre Amieirolongo e a Veigadaña e son unha curva na estrada N-550 na que hai que cruzar e a vía do tren que hai que cruzar a pé tamén. Con esta alternativa evítase ter que cruzar nestes dous puntos.

A pasarela peonil que cruzará o nó de Amieirolongo en Sanguiñeda, que enlazará o punto quilométrico 306 da A-52 coa Nacional 550, zona onde se atopan situadas varias superficies comerciais, será acometida próximamente polo Ministerio de Fomento, investindo un orzamento de 130.000 euros; para o que xa conta co proxecto aprobado, permiso de Patrimonio e coa cesión dos terreos por parte do Concello de Mos.

Con esta pasarela evitarase que os peregrinos (así coma calquera outro viandante e/ou veciño) teñan que cruzar a estrada Nacional 550 no perigoso cruce de Amieirolongo.

O Cristo da Victoria, situado nos Cabaleiros, data de 1612 e está protexido por Patrimonio. A primeira escritura na que figura o cruceiro é do ano 1673. O proxecto de restauración, cun orzamento total de obra que ascende a 16.348,90 euros, consiste en eliminar líquenes e contras (mediante diferentes técnicas de limpeza e aplicación de biocidas), eliminar o encintado de cemento e policromía sintética actuáis, eliminación das intervencións pouco adecuadas como: o repintado, a colocación de valo metálico, a estrutura metálica para luces na parte superior; soterrar a liña eléctrica que afea o ben, e o amaño da contorna.

Ademais tamén se está a acometer a construcción dun muro de contención na Rúa, no contorno do Pazo de Mos. Os traballos teñen o obxectivo de conter o talud e solucionarán a situación de incomodidade que lles supoñen aos veciños da zona os frecuentes desprendementos, que se solucionarán co novo muro de contención.