O Diario Oficial de Galicia (DOG) publicou a resolución da Consellería do Medio Rural pola que se convoca a realización das probas físicas e de agudeza visual aos integrantes das listas do Servizo de Prevención e Defensa contra incendios forestais para determinadas categorías.

Para poder ser contratados nas categorías de técnico superior e técnico forestal de defensa contra incendios forestais, xefe de cuadrilla, condutor de motobomba, peón condutor e peón é imprescindible que os integrantes das listas superen unha proba de aptitude física e outra de agudeza visual (só para o caso das categorías de vixiante fixo e móbil).

Estas probas, que comezarán o vindeiro 18 de abril ás 08:30 horas da mañá, realizaranse nas capitais das catro provincias galegas nos lugares que se indican a continuación:

• A Coruña: Pavillón Polideportivo Monte Alto, rúa Alcalde Sanjurjo, s/n, A Coruña.
• Lugo: Pistas Deportivas Gregorio Pérez Rivera (As Pedreiras), rúa Filarmónica Lucense, s/n, Lugo.
• Ourense: Pavillón Polideportivo da Comisaría de Policía, As Lagoas; s/n, Ourense.
• Pontevedra: Edificio Administrativo da Xunta de Galicia, avenida Fernández Ladreda, nº 43, Pontevedra.

A realización destas probas, obrigatoria e con vixencia anual, estará coordinada por unha comisión provincial composta por dous representantes da Consellería do Medio Rural e un representante das organizacións sindicais. Así mesmo, poderase nomear persoal colaborador das comisións.