A campaña que desenvolve a Deputación de Pontevedra para impulsar a implantación, ao longo deste ano, do certificado de calidade turística SICTED está a ter unha gran acollida entre o sector turístico da provincia. O deputado de Turismo, Santos Héctor, subliñou onte nunha sesión informativa sobre o proxecto,  que xa son 36 as novas empresas que solicitaron a súa inclusión no certificado de calidade en pouco máis dun mes de comezo da campaña.

O deputado de Turismo destacou que a comezos de ano eran  203 empresas na provincia que contan co certificado SICTED e que a previsión coa que traballa a Deputación é que tras a campaña de información que está a desenvolver entre o sector turístico da provincia se superen as 250 empresas. De feito, Santos Héctor subliñou que nestes primeiros encontros co sector a demanda dos interesados está sendo moi importante, ate o punto de que as previsións estanse a cumprir e “fainos ser moi optimistas de cara incluso a superar as nosas propias estimacións”.

Estas estimacións, segundo destacou o deputado provincial, era achegarnos neste primeiro trimestre ate as 35 empresas, “cifra que xa vimos lixeiramente superada tras a celebración da Gala do Turismo Rías Baixas que celebramos en Vigo”.

Para poder optar á certificación, as empresas deben estar englobadas nalgún dos 32 oficios que identifica o SICTED, que son  praias; bares e cafeterías; axencias de viaxe; guías turísticos; seguridade cidadá; comercios; cámpings; adegas; portos deportivos; palacios de congresos; hoteis e apartamentos; turismo industrial; servizos de limpeza; taxis; albergues; convention bureaux; outros servizos; aloxamentos rurais; artesáns; atraque de cruceiros e ferries; servizos turísticos de saúde; empresas de transporte turístico; estacións de esquí e montaña; espazos naturais protexidos; oficinas de información turística; museos e centros de interese turístico; empresas de turismo activo; escolas de español para estranxeiros; aluguer de vehículos e embarcacións de recreo; campos de golf e campos de pitch&putt; restaurantes e empresas turísticas de catering.

As empresas terán ate o próximo día 14 de setembro para adherirse ao proxecto. Posteriormente, abrirase un proceso de formación e asesoramento individual a cada empresa para concluír coa avaliación final. Por último, será Turismo Rías Baixas quen valora as propostas que finalmente obteñan a certificación.

Precisamente hoxe celebrouse en Vilagarcía outra das xornadas de información sobre o certificado SICTED, na que xunto ao deputado de Turismo, participaron o alcalde, Alberto Varela e o concelleiro de Turismo vilagarcián, Juan Antonio Pérez Callón.