Tres bombeiros, un policía e tres traballadores municipais de instalacións deportivas realizaron con éxito este mércores e  xoves un curso sobre o funcionamento dos dispositivos desfibriladores externos semiautomáticos (DESA), homologado pola Consellería de Sanidade dependente da Xunta de Galicia. O curso foi impartido pola autoescola Lusant en colaboración coa Concellería de Seguridade Cidadá e Promoción da Saúde.

Este novo curso, que ten un carácter marcadamente práctico, encádrase nun proxecto iniciado neste ano pola Concellería de Seguridade para facer Ponteareas unha vila cardioprotexida. Dentro deste, o Concello instalou neste ano tres desfibriladores de última xeración nos campos de fútbol de Pardellas, Angoares e Areas, instalacións deportivas de grande utilización. Este novo curso ven a mellorar a formación de diversos traballadores municipais que xa recibiran anteriormente un curso básico sobre RCP e manexo destes dispositivos.
A concelleira de Seguridade Cidadá, Vanesa Fernández, agradeceu “ao persoal docente a formación aplicada neste curso, así como aos traballadores que asistiron. É importante destacar o seu compromiso para mellorar na súa formación con respecto ao manexo dos desfibriladores”. Pola súa banda, a concelleira mostrou “o noso compromiso con esta iniciativa”, asegurando que “faremos estes cursos tódolos anos, para que os traballadores non esquezan o aprendido e sigan formándose”.

Do mesmo xeito, Vanesa Fernández sinalou “a necesidade de que a Xunta de Galicia elabore canto antes o decreto que flexibilice as esixencias actuais sobre os dispositivos DESA, dada a importancia que teñen”.