Unha colisión entre tres coches tivo lugar a noite pasada á altura da localidade pontevedresa de Mos. A particular que chamou ao 112 Galicia para alertar do accidente indicou que se tratou dun choque por alcance, posiblemente, debido á retención de vehículos que nese intre se estaba producindo na confluencia entre a A-52 e a A-55, dirección Vigo. Pese a que, a alertante aseguraba que non había persoas feridas, si amosaba preocupación polo seu bebé, que tamén viaxaba nun dos vehículos implicados.

Dende o Centro de Atención ás Emerxencias do 112 pasouse aviso a Urxencias Médicas e á Garda Civil de Tráfico. Ademais, informouse aos Bombeiros de Baixo Miño e aos efectivos do Servizo de Emerxencias da localidade que se encargaron da limpeza dun vertido de aceite na calzada ocasionado por un dos vehículos. O accidente ocorreu ao fío das 21:00 horas de onte.