A Semana das Ciencias de Ponteareas pechou a semana pasada o seu ciclo de conferencias cunha participación de público que superou as previsións máis optimistas da organización: unha media de duascentas persoas asistiu ás charlas impartidas por destacados persoeiros e persoeiras do mundo da ciencia que, de xeito ameno, cumpriron co obxectivo primordial desta iniciativa que non é outro que achegar a ciencia á cidadanía.

Durante catro días, relatoras e relatores da categoría da historiadora e antropólga física, Andrea Fernández Vilela; Xerardo García Mera, licenciado en Farmacia e doutor en Química Orgánica; Bárbara Álvarez Besadio, licenciada en Bioloxía e máster en Biotecnoloxía; Sergio Quiroga Rivero, enxeñeiro agrónomo e fundador de Ecocelta e Jorge Mira Pérez, licenciado e doutor Europeo en Física, contribuíron a facer da ciencia algo máis próximo e de grande interese.

Cristina Fernández, concelleira de Ensino e promotora desta iniciativa que acada con esta a súa segunda edición, non podía ocultar a súa satisfacción “pola extraordinaria resposta dos veciños e veciñas de Ponteareas e esta Semana das Ciencias”.

 

As actividades continúan hoxe venres coa Feira das Ciencias e pecharanse mañá sábado coa actividade ‘Achégate a Ciencia’ para pecharse coa representación teatral de Artello Teatro, ‘Non toques os meus círculos’

 

A edil ponteareá destacaba o interese da veciñanza e da comunidade escolar por esta iniciativa “que camiña cara a súa consolidación e a facer que a Semana das Ciencias de Ponteareas sexa un referente en todo o país”. Quixo destacar Cristina Fernández “o interese amosado polos alumnos e alumnas que participaron e participan ata o sábado, nas distintas actividades”. Dito interese, apunta a responsable de Ensino do Concello de Ponteareas, “fala ben as claras da capacidade que teñen os nosos rapaces e rapazas de asimilar a ciencia e mirala dende unha visión mais divertida e, non por iso, menos didáctica e rigorosa”.

As actividades continúan hoxe venres, 28 de abril, entre as 17 h e as 20 h, coa denominada ‘Feira das Ciencias’ que se desenvolverá nas rúas Morales Hidalgo e Estrada onde alumnos e alumnas dos centros escolares, co apoio dos seus profesores, expoñerán en pequenos espazos inventos, proxectos investigacións de moi diversa índole e onde o público poderá interactuar con cada un destes inventos.

Mañá 29 de abril, ás 12 horas e nos Xardíns da Xiralda e baixo o título de ‘Achégate á Ciencia’ o alumnado dos centros escolares de Ponteareas amosarán diferentes experiencias científicas.

A II Semana das Ciencias de Ponteareas, pecharase ás 19 horas coa actuación da compañía Artello Teatro que poñerá en escena a obra ‘Non toques os meus círculos’ un divertido espectáculo que, para a súa creación, contou co asesoramento do departamento de Física Aplicada da Universidade de Vigo.