Como ven sendo habitual nos últimos anos, un nutrido grupo de alfombristas de Ponteareas confeccionou na localidade portuguesa de Leiría, unha alfombra floral no Santuario de Fátima. A expedición ponteareá, que chegaba a vila lusa en autobús na mañanciña, tivo que facer fronte a unhas condicións meteorolóxicas totalmente adversas que fixeron, que ademáis do duro traballo de confección da alfombra, esta tivera que ser obxecto de contínuos retoques naqueles puntos no que o seu traballo era desfeito pola chuvia.

Pese aos problemas, o tapiz floral de Ponteareas lucía perfecto ao paso da procesión, que tivo lugar ás cinco da tarde. Os veciños e veciñas de Ponteareas estiveron, en todo momento, rodeados por centos de persoas que non querían perder detalle do esmerado arte floral do que fan gala os e as ponteareás na confección das súas alfombras considerados, alí por onde van, como auténticos mestres na confección de tapices florais. De feito os espectadores facían longas colas para poder fotografiar a alfombra da Vila do Tea.

Representantes da organización quixeron agradecer o aopoio prestado polo Concello de Ponteareas e a presenza de membros do equipo de Goberno que se achegaron a Leiría o domingo pola mañá para ver o desenvolvemento dos traballos.