A Presidenta da Deputación de Pontevedra, Carmela Silva, acompañada pola deputada Digna Rivas e a alcaldesa de Cambados, Fátima Abal, iniciou esta tarde a súa axenda institucional en Lisboa cun encontro coas mulleres da Asociación Ampel, integrada por profesionais españolas, maioritariamente galegas, que viven e traballan na capital portuguesa, e que dedican os seus esforzos ó intercambio e labores de acollida das mulleres recen chegadas á Lisboa, facilitando a súa introdución no mundo laboral e nerworking portugués.

Na reunión, a presidenta provincial compartiu coas mulleres de Ampel algunhas das iniciativas en igualdade postas en marcha nestes dous anos de goberno. Desde a propia creación do Servizo de Igualdade na Deputación, á Escola María Vinyals, o Protocolo para Detección de Violencia de Xénero nos centros de traballo, o programa “Mulleres en Acción. Violencia Zero”, os Premios Sofía Novoa, xornadas como as de Muller e Liderado, as de empoderamento da muller no rural ou as do mar, as Campañas de Xoguetes non sexistas ou iniciativas como “Sorrisos Transformadores”, “Cinema e Muller “ ou “Mulleres Imparables”

Carmela Silva comezou así a súa axenda na capital portuguesa onde mañá martes, acompañada de alcaldes e alcaldesas da provincia de Pontevedra e de representantes do sector turístico, presentará ás 11:00 horas, (12:00 en Galicia), a campaña “Moito por Descubrir. Rías Baixas por moitas razóns” coa que se promoverá a provincia como destino turístico ao longo de 2017.  O acto vaise celebrar na Casa de Galicia de Lisboa ante os medios de comunicación especializados e operadores turísticos da capital portuguesa.

A campaña, que foi presentada nunha gala en Vigo, en Pontevedra e tamén en Madrid, na sede da SGAE, leva agora ata Lisboa os principais eixos promocionais elixidos pola Deputación de Pontevedra este ano: o enoturismo, con Cambados como Cidade Europea do Viño; as variantes do camiño cara Compostela, representadas polas seis rutas que transcorren polas Rías Baixas (Camiño Portugués tradicional, Camiño pola Costa, Vía da Prata, Camiño de Inverno, Ruta do Pai Sarmiento e Ruta do Mar de Arousa e Río Ulla); os festivais musicais Rías Baixas e a calidade turística do destino Rías Baixas.

Amais, co gallo da promoción turística do destino Rías Baixas en Lisboa, a institución provincial quere aproveitar para impulsar e fortalecer as relacións entre a provincia de Pontevedra e Portugal. A Presidenta da Deputación tamén será recibida mañá pola tarde na sede da Assambleia da República de Portugal e, previamente, manterá unha reunión co número dous do Ministerio de Exteriores portugués.