A concellería de Seguridade Cidadá e Mobilidade, xestionada por Vanesa Fernández Soage, ven de enviar unha comunicación a tódalas casas culturais informando sobre os requisitos para poder realizar a fogueira de San Xoán.

Como xa se fixo o ano pasado establécese un prazo dun mes antes da celebración de San Xoán para presentar a solicitude xunto coa documentación necesaria para obter o permiso para a realización da fogueira. Xunto coa solicitude deberase aportar plano de situación da fogueira, seguro de responsabilidade civil e fotocopia do DNI da persoa responsable da queima.

Asemade a concelleira Vanesa Fernández indica tamén unha serie de medidas de seguridade que deben adoptar os responsables das fogueiras como vixiar que o lume quede ven apagado, ter unha devesa perimetral á zona de queima dun mínimo de 5 metros ou dispor de medios de extinción de queima, entre outros.

“A festividade de San Xoán é unha noite máxica onde disfrutan os cativos e os maiores. É unha noite de festa e convivencia entre os veciños e por iso, dende a concellería de seguridade cidadá non queremos que a festa se vexa empañada por ningún suceso tráxico”, afirma Vanesa Fernández Soage, Concelleira de Seguridade Cidadá e Mobilidade.