A alcaldesa de Mos, Nidia Arévalo, e a concelleira de Cultura mosense, Sara Cebreiro, informaron onte de que onte levouse a Comisión Informativa a proposta de concesión de Medallas ao Mérito do Concello de Mos que será aprobada en Pleno o vindeiro luns 29 de maio.

Cada dous anos o Concello de Mos entrega as Medallas ao Mérito do Concello. Neste 2017 celebrarase novamente a Gala de Entrega con motivo das Festas da Rosa. Será o domingo 25 de xuño e realizarase conxuntamente co acto de nomeamento de Fillo Predilecto de Mos a José Leirós, ex presidente da Asociación de Residentes de Mos en Bos Aires, no auditorio do Centro Dotacional do Medio Rural de Torroso a partir das 20.30 horas da tarde.

    
A Medalla ao Mérito Empresarial será para Casa Gallardo, o negocio de hostelería máis antigo de Mos, ao Mérito Deportivo para Susana Alonso Carballo, a ciclista mosense campioa de España de BTT Maratón, ao Mérito Social á Comunidade de Montes de Mos e ao Mérito Cultural á Comunidade de Montes de Torroso.

    
As comunidades de montes son colectivos de gran relevancia no Concello de Mos e que fan unha grande labor en favor das súas respectivas parroquias, no caso da de Torroso sobre todo no eido cultural coa construción do Centro Dotacional e o apoio á Escola Municipal de Música e á Banda de Música Xuvenil de Torroso; e no caso da de Mos no eido social.

Arévalo, rexedora local mosense, declaraba esta mañá a este respecto que “os galardoados esta vez son moi especiais para min como alcaldesa e considero que para todos os mosenses en xeral o son tamén, polo que considero que serán unhas medallas moi aplaudidas polo pobo de Mos”.