Os encoros da Demarcación Hidrográfica Galicia-Costa, administrados por Augas de Galicia, atópanse ao 76,15 por cento da súa capacidade total. Concretamente, os de abastecemento están ao 96,47 por cento, isto é, oito puntos máis que o pasado mes de abril; e os de uso hidroeléctrico ou industrial, ao 74,09 por cento. Así se recolle no último informe no que se sinalan os datos da evolución dos recursos hídricos na Demarcación Galicia- Costa, recollidos o 29 de maio, e no que se indica que os 19 encoros de Galicia- Costa contan cun volume de 525,57 Hm3, dos 690,15 totais.

As chuvias rexistradas nas pasadas semanas permitiron mellorar lixeiramente a situación dos caudais circulantes polos ríos da demarcación, non obstante, e de forma xeneralizada, os indicadores de seguimento seguen presentando valores baixos, o que significa que aínda non se acadan os niveis de normalidade para esta época do ano.

Cómpre lembrar que a situación de prealerta por seca activouse debido ao baixo caudal dos ríos, pero o abastecemento á poboación está garantido como indican os niveis de ocupación dos encoros destinados a este fin. Así, dos nove embalses de abastecemento da demarcación Galicia-Costa, tres presentan unha porcentaxe de ocupación do 100 por cento, que son os de Eiras, Zamáns e Beche; e os restantes, agás Vilagarcía, que está arredor do 55 por cento; todos presentan valores superiores ao 90 por cento, como son os de Cecebre, Forcadas, Caldas de Reis, Pontillón do Castro e Baiona.

En relación ás bacías destinadas ao consumo hidroeléctrico, o nivel medio de ocupación sitúase no 74,09 por cento, pois só o do Eume supera o 90 por cento e os de Ribeira, Fervenza, Vilagudín e Touro rondan o 80 por cento. Na táboa seguinte sinálanse os datos do estado actual dos encoros de abastecemento (azul) e de uso hidroeléctrico (verde).

Comparando a situación actual cos niveis que se rexistraban o pasado ano, o volume dos encoros sitúase 16 puntos por debaixo, xa que o 29 de maio de 2016 estaban ao 92,17 por cento, fronte ao 76,15 por cento actual.

Na páxina web de Augas de Galicia poden acceder ao Boletín Hidrolóxico, no que se amplía a información sobre a evolución dos recursos hídricos no ano hidrolóxico 2016-2017.

Dende Augas de Galicia faise un chamamento a manter a moderación do consumo de auga e o uso responsable deste recurso, dado que a Oficina Técnica da Seca recomenda manter a situación de prealerta por seca, debido ao baixo caudal que presentan os ríos da bacía Galicia-Costa.