"Sete varas, un refaixo" é o título do desfile de traxe tradicional que reunirá máis de 45 traxes antigos ou reproducións fidedignas o vindeiro 10 de xuño no Pazo provincial. Por primeira vez na Galiza, amosarase unha colección desta magnitude que, nos días previos, tamén contempla outras actividades complementarias como unha exposición no CITA e unha mesa redonda sobre "A indumentaria tradicional na actualidade".

Estas actividades están organizadas pola Área de Cultura e Lingua da Deputación de Pontevedra, polo Concello de Pontevedra, e pola Asociación Etnográfica Sete Espadelas. Esta Asociación centra a súa actividade no estudo, recuperación e reprodución de prendas esquecidas ou distorsionadas do traxe tradicional galego, recuperando patróns antigos, o xeito da confección e os tecidos tradicionais. O desfile terá lugar no Pazo provincial, que se acondicionará como unha gran pasarela de moda, aproveitando as escaleiras interiores, o espazo da entrada e a escalinata exterior.