Esta mañá realizouse a presentación da campaña que a tenda AKÍ de Mos inicia con motivo das Festas da Rosa. O acto de presentación celebrouse ás 11.00 horas na propia tenda situada en Amieirolongo, Estrada Nacional 550 Porriño-Redondela; e nel estiveron presentes Nidia Arévalo, alcaldesa de Mos, Kely Monzón, concelleira de Participación Cidadá, e Óscar Soto, edil de Promoción Económica e Emprego, ademais de varios traballadores desta tenda, que leva organizando esta iniciativa dende fai xa cinco anos.

A campaña presentada consiste en que, durante o día de hoxe e ata fin de existencias, os clientes de AKÍ Mos reciben unha rosa como agasallo por calquera compra realizada. Esta iniciativa surxiu ante o interese da empresa AKÍ por involucrarse nos costumes locais e, neste caso en concreto, por apoiar a Festa da Rosa, unha das tradicións locais de maior relevancia. O AKÍ de Mos permanecerá pechado ó público mañá martes 13 de xuño, festivo local, demostrando así de novo o seu respecto polos costumes municipais.

A tenda AKÍ de Mos inaugurouse en decembro de 2012 contando cun investimento na construción das súas instalacións que alcanzou os 4.200.000 euros. O establecemento conta cunha superficie de vendas de 2.940 m², así como con 128 prazas de estacionamento gratuítas para lles facilitar o acceso aos clientes.

O establecemento de Mos, número 36 da compañía, primeiro na provincia de Pontevedra e cuarto na comunidade galega. As instalacións —coma as do resto dos establecementos da compañía— están adaptadas para facilitar o acceso e a compra dos clientes con discapacidade.

Os 15.000 artigos que ofrece AKÍ Mos repártense en 13 departamentos, coñecidos como “Mundos AKÍ”. Estas áreas contan cun estudado deseño que ofrece maior sensación de espazo e amplitude para adquirir os produtos coa máxima rapidez e comodidade.

Ademais, o centro conta coa opción de venda especial por catálogo dixital. Asesorado por un profesional do establecemento por medio dun dispositivo instalado na sala comercial, o cliente poderá escoller entre unha ampla variedade de produtos, visualizando imaxes do artigo, a súa descrición, opcións cromáticas e prezos. Outros servizos, tales como a instalación a domicilio de diversos produtos adquiridos no centro —aires acondicionados, baños e grellas asadoiras— ou a copia de chaves e mandos, entre outros, completan a oferta de AKÍ Mos.