O Concello de Tui acondicionou, con traballadores municipais, a senda do Largartón, cunha lonxitude de 1,5 quilómetros na parroquia de Guillarei. Trátase dun sendeiro antano utilizado de cotío polos veciños pero que quedara en desuso nos últimos anos motivo polo que fóra invadido pola maleza. Tras a intervención realizada pódese disfrutar novamente desta senda que brinda un paseo á sombra de árbores autóctonas, e cruza cunha pequena ponte por riba do regato Lagartón, que lle da nome. Está situada na zona da Veiga comezando fronte á Estación Depuradora de Augas Residuais de Guillarei e remata na parte traseira do tanatorio de Guillarei.  Está moi cerca da Ponte románica sobre o río Louro e do trazado do Camiño Portugués a Santiago. En breve serán sinalizadas con paneis as dúas entradas  e tamén o traxecto interior.

Esta actuación súmase á realizada xa hai meses na senda que une a rúa Olímpicos Tudenses coa vella Ponte Internacional, que forman parte do proxecto integral do goberno tudense de realización de sendas á beira do Miño e dos seus afluentes.