Coincidindo co inicio das vacacións escolares, a organización do III Festival Intercéltico 'O Son do Pazo' fixo entrega dos premios aos gañadores do I Concurso de Relatos Curtos sobre a música galega, dirixido a rapaces de entre 6 e 12 anos. A entrega dos agasallos tivo lugar no Pazo de Mos e contou coa presencia, entre outros, da Concelleira de Cultura, Sara Cebreiro.

O xurado, conformado pola cantante Uxía Senlle, a poetisa María Magdalena Domínguez e a atleta e profesora de lingua galega Soledad Castro, tivo que elixir os gañadores entre os 31 traballos presentados. O primeiro premio, recompensado cun set de xogos para o aire libre, recaeu en Antía Pexegueiro, de 11 anos de idade e alumna do Colexio Pena de Francia, polo seu relato “Música Galega”. A segunda clasificada foi Lidia Alonso, do Colexio de Atín, que recibiu un set de xogos de lóxica e o terceiro premio foi para Pedro Vilas, do Colexio Pena de Francia, que levou un set de xogos populares.

O Concurso de Relatos Breves é unha das principais novidades da terceira edición de 'O Son do Pazo', que terá lugar na contorna do pazo de Mos os días 1 e 2 de setembro. OCírculo Cultural e Deportivo Santa Eulalia de Mos, entidade organizadora do Festival, puxo en marcha o concurso co obxectivo de espertar o interese dos máis pequenos pola cultura e a tradición de Galicia.

Mañá, Tractorada Gaiteira por Mos

A organización xa ten prácticamente pechado o cartel do Intercéltico, polo que volverán pasar algunhas das figuras máis destacadas da escena folc galega e agora os esforzos céntranse na obtención de financiamento. Mañá domingo, os membros da Banda de Gaitas Airiños do Castelo levarán a súa música polos camiños da parroquia de Mos na terceira edición da 'Tractorada gaiteira', co obxectivo de recabar o apoio dos veciños. Xunto coas achegas das distintas institucións públicas e dos patrocinadores privados, a colaboración veciñal é fundamental para facer posible cada ano este proxecto.