Unha muller resultou ferida tras saírse da vía co seu vehículo en Torroso, na estrada que une Puxeiros e Mos. Pasados uns minutos das 07:30 horas desta mañá un particular informaba ao 112 Galicia dun coche que chocara contra a mediana  da A-55 e rebotara contra outro turismo. Ademais de recibir a alerta doutros particulares, tamén, unha das condutoras implicadas solicitaba ao 112 Galicia asistencia sanitaria para ela mesma. Aseguraba que o outro condutor estaba ben. Así, pasouse aviso, decontado, a Urxencias Médicas e á Garda Civil de Tráfico. Tamén se informou aos Bombeiros de Baixo Miño, a Protección Civil de Mos e ao servizo de mantemento da estrada.  

Membros do servizo municipal de emerxencias da localidade confirmaron ao persoal do Centro de Atención ás Emerxencias do 112 que, finalmente, a muller foi atendida no mesmo lugar polo persoal sanitario, sen ser preciso o seu traslado.