A Presidenta da Deputación de Pontevedra, Carmela Silva, amosou esta semana a súa preocupación polos datos que se desprenden dos rexistros do Servizo Público de Emprego Estatal relativos ás persoas demandantes de emprego, ao paro, aos contratos e prestacións por desemprego relativas ao mes de xuño. Se ben Carmela Silva valorou positivamente a redución do número de persoas desempregadas en todo o Estado, advertiu que unha vez que se analizan os datos polo miúdo “non podemos deixar de falar de precariedade, temporalidade e de baixa taxa de cobertura de desemprego”.

No que se refire ás cifras estatais a Presidenta advertiu de que “se imos ao fondo dos datos vemos como apenas o 7,97% dos traballos que se crean son indefinidos e ademais, desta porcentaxe, preto do 30% son a xornada parcial. Polo tanto, o pouco traballo estable que se crea tampouco ten as garantías de acadar traballadores e traballadoras que teñan recursos e dereitos para fortalecer a economía”. Ademais, estes salarios baixos e a inestabilidade laboral son os causantes de que a demanda interna no país “siga estando coxa”.

Igualmente, Carmela Silva amosouse preocupada porque en Galicia o número de empregos indefinidos está por debaixo do 10%. No caso de Pontevedra hai 74.654 persoas desempregadas e a esta baixa contratación hai que engadir que a maioría dos contratos son a tempo parcial o que supón “un serio problema” e constitúen, para a Presidenta da Deputación, “uns datos inasumibles”.

En canto ás taxas de cobertura de desemprego no Estado, a Presidenta lembrou que “o 46% das persoas sen traballo tampouco teñen cubertas as súas necesidades básicas” e recordou que “no ano 2011 a taxa de cobertura estaba por riba do 80%  polo que, a pesar de que había desemprego, as familias tiñan cubertas as súas necesidades básicas”. Na provincia de Pontevedra os datos son similares, xa que un 51,1% das persoas desempregadas non están cubertas polas axudas ao desemprego.

Carmela Silva insistiu na importancia de defender un emprego de “calidade, fixo, estable e de dereitos”. Un modelo no que “os e as traballadoras se formen na empresa, cos valores da empresa, con contratos dignos, estables e duradeiros”. Ademais, “este modelo con empregos fixos e de calidade fai que as persoas traballadoras sexan máis produtivas e teñan un maior compromiso coa empresa, e que polo tanto rendan máis e mellor”, explicou Carmela Silva.